कोल्हापूर (प्रतिनिधी) : केडीसीसी बँकेमध्ये इतर मागासवर्ग महामंडळ योजनेचे कर्ज मंजुरीपत्र लाभार्थ्याला देण्यात आले. कागल येथील सागर शिवाजीराव गुरव यांना दूध व्यवसायासाठी पाच लाखांचे बिनव्याजी कर्जाचे मंजुरीपत्र देण्यात आले.
केडीसीसी बँकेच्या वतीने अण्णासाहेब पाटील आर्थिक विकास महामंडळाच्या माध्यमातून मराठा समाजातील बेरोजगार तरुणांना रोजगार, उद्योग-व्यवसायासाठी मोठ्या प्रमाणात अर्थसहाय्य सुरू आहे. बँकेने आतापर्यंत एक हजारांवर बेरोजगार युवकांना कर्जपुरवठा केला आहे. त्याच धर्तीवर राज्य शासनाच्या हमीवर महाराष्ट्र राज्य इतर मागासवर्ग वित्त व विकास महामंडळ योजनेअंतर्गत दहा लाख रुपयांपर्यंतचे बिनव्याजी कर्ज दिले जाणार आहे. त्याचे मंजुरीपत्र देण्यात आले.
बँकेचे अध्यक्ष व आ. हसन मुश्रीफ म्हणाले, समृद्ध ग्रामव्यवस्थेसाठी महात्मा गांधीजींनी खेड्याकडे चला हा मंत्र दिला होता. या योजनेमुळे गाव खेड्यातील बारा-बलुतेदारीतील उद्योग व्यवसाय व रोजगाराला निश्चितच चालना मिळेल.
उपाध्यक्ष आमदार राजूबाबा आवळे, आ. सतेज पाटील, आ. राजेंद्र पाटील-यड्रावकर, खा. प्रा. संजय मंडलिक, आ. पी. एन. पाटील, आ. राजेश पाटील, माजी खा. डॉ. निवेदिता माने, ए. वाय. पाटील, प्रताप ऊर्फ भय्या माने, बाबासाहेब पाटील -आसुर्लेकर, संतोष पाटील, प्रा.अर्जुन आबिटकर, सुधीर देसाई, रणवीरसिंग गायकवाड, विजयसिंह माने, श्रुतिका काटकर, व्यवस्थापक जी. एम. शिंदे उपस्थित होते.
