मुंबई ; अॅड. गुणरत्न सदावर्ते दाम्पत्याला सहकार खात्याने मोठा दणका दिला आहे. गुणरत्न सदावर्ते आणि त्यांच्या पत्नी जयश्री पाटील यांचे एसटी बँकेवरील संचालकपद रद्द करण्यात आले आहे. ते या पुढे तज्ञ संचालक म्हणून दोघेही एसटी बँकेवर राहू शकणार नाहीत. बँकेच्या सभेत बेकायदेशीर मंजूर केलेले पोटनियम रद्द करण्याची नामुष्की आता संचालक मंडळावर आली आहे. यानंतर अॅड. गुणरत्न सदावर्ते यांनी आदित्य ठाकरे यांना लक्ष करत डिपॉजिट जप्त करण्याचं चॅलेंज दिलं आहे.
राज्याच्या सहकार खात्याने अॅड. गुणरत्न सदावर्ते यांना मोठा धक्का दिला आहे. आणि त्यांच्या पत्नी जयश्री पाटील यांचं एसटी बँकेचं संचालकपद रद्द केल्यानंतर सदावर्तेंनी आता थेट आदित्य ठाकरेंना आव्हान दिलंय. येणाऱ्या विधानसभेमध्ये मी आदित्य ठाकरे यांना चॅलेंज देतो, येणाऱ्या वरळी विधानसभेमध्ये त्यांनी डिपॉजिट जप्त करून दाखवावं. आदित्य ठाकरेंचं डिपॉजिट जप्त नाही केलं तर मी मिशा ठेवणार नाही असं थेट आव्हान अॅड. गुणरत्न सदावर्तेंनी दिलंय.
अॅड. गुणरत्न सदावर्ते म्हणाले की, तुम्ही वीर जिजामाता नगरमध्ये येऊन पाहा, सदावर्तेच्या मागे किती शक्ती आहे. उद्धव ठाकरेंच्यामागे एकही माणून दिसणार नाही. वरळीमध्ये अंतर्गत खूप काम सुरू आहे, आदित्यच्या पायाखालची वाळू सरकली आहे. वरळीतून आदित्य ठाकरे यांनी निवडणूक लढून दाखवावी. पहिल्या 25 टक्के मतमोजणीतच आदित्य ठाकरे रडत रडत घरी जातील. त्यांचं डिपॉजिट जप्त करणार.
तसेच आमचं संचालक पद रद्द केलेलं नाही, सर्व बातम्या खोट्या असून त्या बातमीचा निषेध करतो असं गुणरत्न सदावर्ते म्हणाले. तक्रारदार संदीप शिंदे हे शरद पवारांच्या ताटाखालचं मांजर असल्याचा आरोपही त्यांनी केला.
आमचं संचालकपद रद्द केलं नाही
अॅड. गुणरत्न सदावर्ते म्हणाले की, सदावर्ते आणि जयश्री पाटील यांची बातमी देत त्या संदीप शिंदेने पत्रकारांना उल्लू बनवलं. शरद पवार यांच्या ताटाखालचा तो माणूस आहे. अतिशय खोटी लबाड अशी ही बातमी आहे. ही बातमी पसरवण्यामागे कुभांड आहे. बॅंकेवर सामान्य कष्टकरी निवडून आणल्यानंतर शरद पवारांना जळजळ होतेय, सोबतच त्यांच्या आजूबाजूच्यांना आग लागली आहे. आमचं संचालक पद रद्द केलेलं नाही , यासंदर्भात प्रोसिडिंग देखील झालेली नाही. या बातमीचा निषेध करतो.
