नवी दिल्ली ( वृत्तसंस्था ) आपल्या मागण्यांसाठी शेतकरी आज दिल्लीत आंदोलन करणार आहेत. अनेक आंदोलक मोठ्या संख्येने आता दिल्लीकडे कुच करत आहेत. या पार्श्वभूमीवर राहुल गांधींनी मोठी घोषणा करत काँग्रेसचे सरकार आल्यास आम्ही एमएसपीला कायदेशीर हमी देणार असल्याची घोषणा त्यांनी केली आहे.
मिळालेल्या माहितीनुसार राहुल गांधींनी ट्विट करत म्हटले आहे की, ‘शेतकरी बांधवांनो, आजचा दिवस ऐतिहासिक आहे ! स्वामिनाथन आयोगानुसार प्रत्येक शेतकऱ्याच्या पिकांवर किमान MSP कायदेशीर हमी देण्याचा निर्णय काँग्रेसने घेतला आहे. हे पाऊल 15 कोटी शेतकरी कुटुंबांची समृद्धी सुनिश्चित करून त्यांचे जीवन बदलेल. न्यायाच्या मार्गावर काँग्रेसची ही पहिली हमी आहे. राहुल गांधी यांनी जाहीर सभेतही याच गोष्टीची पुनरावृत्ती केली आणि शेतकरी दुसरे काही मागत नसल्याचे सांगितले.
राहुल गांधी म्हणाले, ‘स्वामिनाथनजींनी त्यांच्या अहवालात स्पष्टपणे म्हटले आहे की, शेतकऱ्यांना एमएसपीची कायदेशीर हमी मिळाली पाहिजे. मला इथे सांगायचे आहे की जर भारत आघाडीचे सरकार स्थापन झाले तर आम्ही स्वामिनाथन जीच्या अहवालाची अंमलबजावणी करू. आम्ही तुम्हाला एमएसपीची हमी देऊ. इतकंच नाही तर राहुल गांधी म्हणाले की, ही पहिली गोष्ट आम्ही बोललो आहोत.
आमचा जाहीरनामा तयार होत असून त्यात आम्ही शेतकरी आणि मजुरांसाठी अनेक गोष्टी आणत आहोत. अशाप्रकारे काँग्रेस पक्ष शेतकऱ्यांच्या एमएसपीच्या मागणीला निवडणुकीचा मुद्दा बनवणार असल्याचे राहुल गांधींनी स्पष्ट केले.
