मुंबई उत्तर पश्चिम लोकसभा मतदारसंघात झालेल्या अटीतटीच्या लढाईत शिंदेसेनेचे उमेदवार रवींद्र वायकर निवडून आले असले तरी मतमोजणीबाबत उद्धवसेनेचे उमेदवार अमोल कीर्तिकर यांनी आक्षेप घेतला आहे. याबाबतर कीर्तिकर यांनी न्यायालयात धाव घेतली आहे. तर खासदार रवींद्र वायकर यांच्या मेव्हण्याच्या मतमोजणी केंद्रात मोबाईल फोनवापर प्रकरणी मोठी माहिती समोर आली आहे. ईव्हीएम मशीनशी जोडलेला फोनच वायकरांच्या मेहुण्याला वापरायला दिल्याची माहिती मिळत आहे. याच मोबाईल फोनने ईव्हीएम मशीन अनलॉक करण्यात आल्याची धक्कादायक माहिती समोर आली आहे.
दरम्यान, मिळालेल्या माहितीनुसार, याच मोबाईलवर आलेल्या ओटीपीने ईव्हीएम मशीन अनलॉक केले गेले. पोल पोर्टल ऑपरेटर दिनेश गुरव यांनी वायकरांचे मेहुणे मंगेश पंडीलकर यांना मतमोजणी केंद्रात आपला फोन वापरायला दिल्याचा आरोप केला जातोय. मतमोजणी केंद्रात फोनचा वापर करण्यास मनाई होती. पोलिसांनी फोन जप्त करून FSL ला पाठवला आहे. तर यासंदर्भात मंगेश पंडीलकर वनराई पोलिसांनी वायकर यांचा नातेवाईक मंगेश पंडीलकर आणि निवडणूक आयोगाचा एनकोर ऑपरेटर दिनेश गुरव यांच्याविरोधात गुन्हा दाखल केला आहे. आता तपासात पंडीलकर ईव्हीएमशी जोडलेला मोबाइल फोन वापरत असल्याचे निदर्शनास आले आहे. पोलिसांनी त्यानुसार इतर उमेदवारांचे जबाब नोंदवले असून, लवकरच याप्रकरणी अटक वॉरंट जारी करण्यात येणार आहे.
वनराई पोलिसांच्या म्हणण्यानुसार, पंडीलकरकडे सापडलेला फोन हा दिनेश गुरव यानेच त्याला दिला होता. हा मोबाइल फोन 4 जून रोजी नेस्को सेंटरमध्ये वापरण्यात आलेले ईव्हीएम मशीन अनलॉक करण्यासाठी आवश्यक असलेला ओटीपी तयार करण्यासाठी वापरला गेला.
आता फोनवरील बोटांचे ठसे घेतले जाणार आहेत. तसेच पंडीलकर यांनी कोणाशी बोलणं केलं, याचा देखील पोलीस तपास करणार आहे. दोघांनाही 41(अ) ची नोटीस बजावत हजर राहण्याचे समन्स पाठवण्यात आले आहेत. मुंबई उत्तर पश्चिम लोकसभा निवडणुकीच्या मतमोजणीच्या निकालाविरोधात अमोल किर्तीकरांनी निवडणूक आयोगात धाव घेतली होती.
अमोल किर्तीकर यांनी मुंबई उत्तर पश्चिम लोकसभा निवडणुकीच्या मतमोजणीत गैरप्रकार झाल्याचा आरोप केला होता. याप्रकरणी मतमोजणी कक्षात मोबाईल वापरल्याप्रकरणी रविंद्र वायकर यांच्या मेहुण्याविरोधात गुन्हा दाखल करण्यात आला होता. त्यानंतर आता या प्रकरणात मोठमोठे खुलासे होत आहेत. धक्कादायक माहिती समोर येत आहे. वायकरांनी कीर्तिकरांचा अवघ्या ४४ मतांनी पराभव केलाय.
