कोल्हापूर ( प्रतिनिधी ) : भारतीय पुरातत्व सर्वेक्षण विभाग नवी दिल्ली यांच्या सुचनेनुसार श्री अंबाबाईच्या गर्भगृहाची स्वच्छता आणि इतर सुचनांची पूर्तता, त्यांच्या देखरेखीखाली आज दिनांक 13 ऑगस्ट रोजी पूर्ण करुन घेण्यात येणार आहे. तर गुरुवार दि. 14 ऑगस्ट रोजी धार्मिक विधी पूर्ण झाल्यानंतर श्री महालक्ष्मी (अंबाबाई) चे दर्शन पूर्ववत सुरु करण्यात येणार आहे असे आवाहन देवस्थान व्यवस्थापन समिती, पश्चिम महाराष्ट्र, कोल्हापूर यांच्यावतीने करण्यात आले आहे.
करवीर निवासिनी श्री महालक्ष्मी (अंबाबाई) मूर्ती सुस्थितीत राहणेच्या अनुषंगाने, जिल्हाधिकारी कोल्हापूर तथा प्रशासक देवस्थान व्यवस्थापन समिती, पश्चिम महाराष्ट्र, कोल्हापूर यांच्यावतीने मूर्तीची पाहणी करण्यासाठी भारतीय पुरातत्व सर्वेक्षण नवी दिल्ली यांना कळविले प्रमाणे त्यांच्याकडून काम सुरु करण्यात आले होते. त्यानुसार सोमवार दिनांक 11 ऑगस्ट रोजी सायंकाळी उशीरा करवीर निवासिनी श्री महालक्ष्मी (अंबाबाई) देवीच्या मूर्तीची पाहणी आणि संवर्धन प्रक्रीयेचे काम भारतीय पुरातत्व विभागाकडून सुरु करुन ते आज मंगळवार दिनांक 12 ऑगस्ट रोजी पूर्ण करण्यात आले आहे.
