नवी दिल्ली ( वृत्तसंस्था ) अर्थमंत्री निर्मला सीतारामन उद्या म्हणजेच 1 फेब्रुवारी रोजी अंतरिम अर्थसंकल्प सादर करणार आहेत. त्याआधी सरकारने सर्वसामान्यांना मोठा दिलासा दिला आहे. सरकारने आयात केलेल्या मोबाईल घटकांवरील आयात शुल्क 5% ने कमी केले आहे. यामुळे देशात मोबाईल पार्ट्स आयात करण्याचा खर्च कमी होणार असून ग्राहकांना त्याचा फायदा होणार आहे.
अर्थ मंत्रालयाने एका अधिसूचनेत म्हटले आहे की, मोबाइल घटकांवरील आयात शुल्क 15 टक्क्यांवरून 10 टक्के करण्यात आले आहे. भारतात मोबाईल बनवणाऱ्या Apple आणि Xiaomi सारख्या कंपन्यांना याचा फायदा होईल. तसेच, हे घटक बनवण्यासाठी वापरल्या जाणाऱ्या निविष्ठांच्या आयातीवरील आयात शुल्क शून्यावर आणण्यात आले आहे. अधिसूचनेनुसार बॅटरी कव्हर, मेन कॅमेरा लेन्स, फ्रंट कव्हर, मिडल कव्हर, बॅक कव्हर, जीएसएम अँटेना, पीयू केस, सिम सॉकेट, स्क्रू, प्लास्टिक आणि मेटल यासारख्या घटकांचा समावेश आहे.
हे असेंबलिंगमध्ये वापरले जातात. सध्या देशात तयार होणारे मोबाईलचे बहुतांश भाग बाहेरून आयात केले जातात. आयात शुल्कात कपात केल्यामुळे मोबाईल फोनच्या किमतीही कमी होतील, अशी अपेक्षा आहे. इंडिया सेल्युलर आणि इलेक्ट्रॉनिक्स असोसिएशनने एका निवेदनात म्हटले आहे की, या निर्णयामुळे दिवसा मोबाइल फोन निर्मितीमध्ये अधिक स्पर्धा होईल. हे पाऊल ॲपलसारख्या कंपन्यांना भारतात महागडे स्मार्टफोन बनवण्यास मदत करेल असा ही अंदाज व्यक्त केला जात आहे.
