टोप (प्रतिनिधी) : हातकणंगले तालुक्यातील कासारवाडीतील घाटात गुरुवारी सायंकाळी पाच वाजण्यासुमार पतीने पत्नीचा संशयावरून चाकूने भोसकून खून करून पोबारा केला होता. याला शिरोली पोलिसानी अटक करून त्याला न्यायालयात हजर केले असता त्यास चार दिवसांची पोलीस कोठडी सुनावली आहे.
जोतीबा देवाचे देवदर्शन घेवून घरी परतत असताना पती सचिन रजपूत (वय ३२) याने पत्नी शुभांगी सचिन रजपूत (वय २९ रा. सध्या हनुमान नगर शिये, ता. करवीर, मुळगाव गडहिंग्लज) हिचे अन्य व्यक्तीशी अनैतिक संबंध असलेल्याच्या संशयावरून दोघात भांडण झाले. शुभांगीचा गुरुवारी सायंकाळी पाच वाजण्यासुमार कासारवाडी घाटात चाकूने भोसकून खून करून सचिनने घटनास्थळावरून पसार झाला होता. सचिन शुक्रवारी सकाळी सात वाजण्यासुमार सोलापूर येथील फौजदार चौकीत स्वतःहून हजर राहुन केलेल्या खुनाची माहीती दिली.
त्यानंतर शिरोली पोलिसांनी आरोपी पती सचिन रजपूत यास ताब्यात घेऊन खुनाचा तपास केला असता त्याने आपल्या पत्नीचा अन्य व्यक्तीशी अनैतिक संबंध असल्याच्या संशयावरून मी तीचा खून केला असल्याचे सांगीतले त्यास आज पेठवडगाव न्यायालयात हजर केले असता त्याला चार दिवसांची पोलिस कोठडी सुनावली.
