इचलकरंजी ( प्रतिनिधी ) : सांगली मार्गावरील यड्राव फाट्याजवळील एसबीआय बँकेचे एटीएम मशिन गॅस कटरने फोडून सुमारे 7 लाख रूपये लंपास केल्याची घटना उघडकीस आली आहे. चारचाकी वाहनातून आलेल्या 3-4 जणांनी अवघ्या 10 मिनिटात हे सर्व केल्याचे सिसीटीव्ही कॅमेऱ्यात कैद झाले आहे. विशेष म्हणजे याच टोळीने यड्रावनंतर सांगली-तासगाव मार्गावरील बुधगाव येथील बँक ऑफ इंडियाचे एटीएम मशिन गॅस कटरने फोडुन सुमारे 16 लाख रुपये लंपास केल्याचेही प्राथमिक तपासात उघड झाले आहे.
शहापुर पोलीस ठाणे हद्दीतील इचलकरंजी-सांगली मार्गावरील यड्राव फाट्याजवळ एसबीआय बँकेचे एटीएम मशिन फोडल्याचा प्रकार आज सकाळी 7 वाजता उघडकीस आलाय. घटनेची माहिती मिळताच अप्पर पोलीस अधिक्षक निकेश खाटमोडे-पाटील, उपअधिक्षक समिरसिंह साळवे यांच्यासह गावभाग, शिवाजीनगर, शहापूर आणि स्थानिक गुन्हे अन्वेशन विभागाचे पोलीस अधिकारी, कर्मचारी दाखल झाले. पोलीस अधिकाऱ्यांनी परिसरातील सीसीटीव्ही फुटेज तपासले असता एसबीआय बँकेच्या एटीएम केंद्राजवळ मंगळवारी रात्री 2 च्या सुमारास चारचाकी वाहन आले. या चारचाकी वाहनातून तोंडाला कापड बांधलेला एकटा उतरला आणि एटीएम परिसराची पाहणी केली. परिसरात कोणीही नसल्याची खात्री करून घटना सीसीटीव्ही कॅमेऱ्यात कैद होऊ नये म्हणून 2 सीसीटीव्ही कॅमेयांवर स्प्रे मारला आणि चारचाकी वाहन एटीएम केंद्राजवळ घेतले. गाडीतून 3-4 जणांनी गॅस कटरसह अन्य साहित्य काढले आणि एटीएम केंद्राचे शटर बंद करून कटरच्या सहाय्याने एटीएम फोडले. एटीएम फोडण्यासाठी वापरलेले सर्व साहित्य गाडीत ठेवून 3 वाजता या टोळीने पलायन केल्याचे सीसीटीव्हीत कैद झाले आहे. शासकीय बँकेचे एटीएम मशिन असले तरी त्या ठिकाणी सुरक्षारक्षक अथवा मशिन सुरक्षितेबाबतचा सायरन नसल्याचेही प्राथमिक पाहणीत स्पष्ट झाले.
या घटनेत सुमारे 7 लाखाची रोकड घेऊन टोळीने पलायन केल्याचा अंदाज वर्तवला जात आहे. दरम्यान गुन्ह्याची पद्धत पाहता एटीएमबाबत माहिती असलेल्या माहितगार आंतरराज्य टोळीने एटीएम फोडल्याचा अंदाज व्यक्त केला जात आहे. त्यादृष्टीने तपासासाठी पोलीस पथके रवाना केली आहेत.
