नवी दिल्ली ( वृत्तसंस्था ) केंद्र सरकार पीएम-किसान अंतर्गत मिळणारी रक्कम वाढवू शकते. अर्थमंत्री निर्मला सीतारामन 1 फेब्रुवारीला अंतरिम अर्थसंकल्प सादर करणार आहेत. दरम्यान त्या पीएम-किसान फंड वाढवण्याची घोषणा होऊ शकते. सध्या प्रत्येक वर्षी 6,000 रुपये तीन हप्त्यांमध्ये दिले जातात. ते 8,000 ते 9,000 रुपयांपर्यंत वाढवले जाऊ शकतात.
खात्रीलायक सुत्रांनी म्हटले आहे की, पीएम-किसानची रक्कम 6,000 रुपयांवरून 8,000-9,000 रुपयांपर्यंत वाढवली जाऊ शकते. शेतकऱ्यांना चार हप्त्यांमध्ये 8,000 रुपये किंवा तीन हप्त्यांमध्ये 9,000 रुपये दिले जाऊ शकतात. पीएम-किसानच्या महिला लाभार्थ्यांसाठी, ते 10 ते 12 हजार रुपये केले जाऊ शकते.
सरकारने यंदाच्या अर्थसंकल्पात PM-Kisan साठी 60,000 कोटी रुपयांची तरतूद केली आहे. ही रक्कम 8,000 रुपयांपर्यंत वाढवल्यास वार्षिक वाटप 88,000 कोटी रुपयांपर्यंत वाढवावे लागेल. त्याचप्रमाणे, पीएम-किसानची रक्कम 9,000 रुपयांपर्यंत वाढवल्यास, वार्षिक वाटप 99,000 कोटी रुपये होईल.
सुरुवातीला पीएम-किसान योजना केवळ अल्पभूधारक आणि लहान शेतकऱ्यांसाठी सुरू करण्यात आली होती, परंतु नंतर सर्व शेतकऱ्यांना त्यात समाविष्ट करण्यात आले. पीएम किसान सन्मान निधी योजनेंतर्गत जेव्हा राज्य सरकार महसूल रेकॉर्ड, आधार क्रमांक आणि अर्ज करणाऱ्या शेतकऱ्यांच्या बँक खाते क्रमांकाची पडताळणी करते तेव्हाच पैसे दिले जातात.
