सिंधुदुर्ग (प्रतिनिधी) : श्री देव कुणकेश्वर मंदिर देवस्थान ट्रस्ट कुणकेश्वर यांच्या वतीने यंदाही २२ ऑक्टोंबर रोजी दीपावली पाडवानिमित्ताने श्री क्षेत्र कुणकेश्वर दीपोत्सव २०२५ मोठ्या भक्तिभावात आणि सांस्कृतिक उत्साहात साजरा करण्यात येणार आहे. या वर्षीचा दीपोत्सव २१ हजार पणत्या प्रज्वलित करण्याचा संकल्प देवस्थान ट्रस्ट अध्यक्ष एकनाथ तेली यांनी व्यक्त केला. कुणकेश्वर देवस्थान ट्रस्ट मध्ये आयोजित पत्रकार परिषदेत ते बोलत होते.
बुधवार, दिनांक २२ ऑक्टोबर २०२५ रोजी सायंकाळी ६.०० वाजल्यापासून सुरू होईल. मंदिर परिसर दीपोत्सवाच्या प्रकाशात उजळून निघणार असून, विविध सांस्कृतिक कार्यक्रमांच्या माध्यमातून भाविकांना भक्तिमय अनुभव मिळणार आहे.यावर्षीच्या दीपोत्सवात मंदिर परिसरामध्ये रांगोळी प्रदर्शन, सांस्कृतिक कार्यक्रम तसेच २१ हजार पणत्याची आरास करण्याचा संकल्प देवस्थान ट्रस्टच्या वतीने व्यक्त करण्यात आला आहे. हा दिपोत्सव सर्वासाठी आकर्षणाचे केंद्र ठरणार आहे. या उत्सवाच्या आयोजनासाठी प्रत्येकी पणतीला १० रुपये देणगी निश्चित करण्यात आली आहे. ट्रस्टच्या वतीने सर्व भाविकांना सहभागी होऊन दीपोत्सव यशस्वी करण्याचे आवाहन करण्यात आले आहे.
या कार्यक्रमानिमित्त “स्वर श्रीपाद” या संगीत मैफिलीचे आयोजन करण्यात आले आहे. या मैफिलीत प्रसिद्ध गायक कलाकार श्रीपाद शांताराम जाबोडकर (मडगाव,गोवा) तसेच गायिका करिष्मा शेटकर (गोवा) युवा गायक साईश नाईक (गोवा) यांचे सुमधुर गायन रसिकांना ऐकायला मिळणार आहे. त्यांना साथ देणार आहेत केतन च्यारी (गोवा)कीबोर्ड, सिन्थेसाईझर), श्री राज मडगांवकर (गोवा तबला) ,प्रतीक धामस्कर,(गोवा)(संवादिनी)
प्रतीम धामस्कर (पखवाज/टाळ) तर या मैफिलीचे सूत्रसंचालन सौ. अलीशा नाईक करणार आहेत. दीपावली पाडव्यानिमित्त आयोजित दीपोत्सव कार्यक्रमादरम्यान होणारे कार्यक्रम असे मुख्य मंदिरामध्ये मान्यवरांच्या हस्ते दीपप्रज्वलन सायं ७:००,मंदिर व परिसरातील दीपज्वलन सोहळा सायं ७:१५ , स्वर श्रीपाद (गोवा) सांज मैफल सायं ६:०० ते ८:३०,सन्मान सोहळा रात्री ८:३० ते ९:००, पालखी प्रदक्षिणा सोहळा रात्री ९:०० ते ९:३०,सांगता रात्री ९:३० आदी कार्यक्रम संपन्न होणार आहेत. अशी माहिती कुणकेश्वर देवस्थान ट्रस्टचे अध्यक्ष एकनाथ दिली यांनी दिली.
तर या भव्य दीपोत्सवाच्या निमित्ताने श्री देव कुणकेश्वर मंदिर देवस्थान ट्रस्टतर्फे सर्व भक्तजन आणि नागरिकांनी मोठ्या संख्येने उपस्थित राहून या पारंपरिक उत्सवात सहभागी व्हावे आणि श्री देव कुणकेश्वरांच्या कृपेचा लाभ घ्यावा. असे आवाहन करण्यात आले.
यावेळी कुणकेश्वर देवस्थान ट्रस्टचे खजिनदार उदय पेडणेकर, सरपंच महेश ताम्हणकर,संजय वाळके, महेश जोईल , व्यवस्थापक रामदास तेजम आदी उपस्थित होते.
