मुंबई : राज्यात नुकत्याच झालेल्या विधानसभा निवडणुकीत महायुती सरकारने जोरदार मुसंडी मारली आहे. दरम्यान महायुतीच्या या विजयात मुख्यमंत्री माझी लाडकी बहीण योजनेचा मोठा वाटा आहे. याचबरोबर या निवडणुकीच्या प्रचारात महायुतीच्या नेत्यांनी योजनेचे पैसे 2100 रुपयांपर्यंत वाढवण्याचे आश्वासन दिले होते. आता निवडणुकीनंतर राज्यातील महिला योजनेच्या डिसेंबरच्या हप्त्याच्या प्रतिक्षेत आहे. अशात शिवसेना शिंदे गटाचे कॅबिनेट मंत्री उदय सामंत यांनी डिसेंबरचा हप्ता केव्हा येणार याबाबत माहिती दिली आहे.

काय म्हणाले उदय सामंत

उदय सामंत म्हणाले, मुख्यमंत्री देवेंद्र फडणवीस यांनी लाडक्या बहीण योजनेसाठी 1400 कोटी रुपयांच्या अतिरिक्त निधीची तरतूद केल्याच सांगण्यात येत आहे. अर्थसंकल्पीय अधिवेशनात लाडक्या बहिणींना दिली जाणारी 1500 रुपयांची रक्कम 2100 रुपये इतकी केली आहे. हिवाळी अधिवेशनात लाडकी बहीण योजनेबाबत घेतला गेलेला हा सर्वात मोठा निर्णय आहे. जो अधिवेशनाच्या पहिल्याच दिवशी घेतला गेला.

नागपुरात सुरु असलेल्या विधिमंडळाच्या हिवाळी अधिवेशनात कॅबिनेट मंत्री उदय सामंत यांनी लाडक्या बहीण योजेनेतील डिसेंबरच्या हप्त्याबाबत माहिती दिली. ते म्हणाले की, सोमवारीच पुरवणी यादीमध्ये 1400 कोटी रुपयांची तरतूद केली आहे. त्यामुळे लवकरात लवकर माझ्या लाडक्या बहीणींच्या खात्यात पैसे जमा होणार आहेत.

निवडणुकीच्या निकालानंतर मुख्यमंत्री देवेंद्र फडणवीस यांनी लाडक्या बहीण योजेनेची रक्कम 1500 रुपयांहून 2100 रुपये केली. पण यावेळी दिलेल्या माहितीनुसार, लाडक्या बहिणींच्या कागदपत्रांबाबत काही निकष ठरवण्यात आले आहेत. हे निकष तपासून महिलांना पैसे दिले जाणार आहे. त्यामुळे हे पैसे कधी मिळणार असा देखील प्रश्न महिलांकडून विचारला जात आहे