कोल्हापूर (प्रतिनिधी) : अत्यंत प्रतिष्ठेच्या झालेल्या कोल्हापूर दक्षिण आणि कोल्हापूर उत्तर विधानसभा मतदारसंघात मतदान झाल्यानंतर काँग्रेससह महाविकास आघाडीचे कार्यकर्ते, पदाधिकाऱ्यांनी धैर्यप्रसाद हॉल येथे जमत ऋतुराज पाटील यांना खांद्यावर घेत त्यांच्या विजयाच्या घोषणा दिल्या. तर उत्तरचे उमेदवार राजेश लाटकर यांना निकाला आधीच गुलाल लावत कार्यकर्त्यांनी जल्लोष केला.
विधानसभा निवडणुकीत काँग्रेससह महाविकास आघाडीचे उमेदवार ऋतुराज पाटील आणि राजेश लाटकर यांच्यासाठी मोठ्या नेटाने राबले. मतदान झाल्यानंतर काँग्रेसचे विधानपरिषदेचे गटनेते सतेज पाटील यांनी बुधवारी या दोन्ही मतदारसंघातील कार्यकर्त्यांचे धैर्यप्रसाद हॉल येथे आभार मानले. यावेळी सतेज पाटील यांच्यासह दोन्ही उमेदवारांची भेट घेण्यासाठी मोठी गर्दी झाली होती. दक्षिण आणि उत्तर विधानसभा मतदारसंघातील महाविकास आघाडीच्या उमेदवारांच्या मतदानयाद्यांची प्रक्रिया धैर्यप्रसाद हॉल येथून पार पाडली जात होती. त्यामुळे मतदान झाल्यानंतर महाविकास आघाडीचे कार्यकर्ते धैयप्रसाद हॉल येथे जमले. सतेज पाटील यांनी त्यांच्याकडून गावांमध्ये, प्रभागांमध्ये किती मतदान झाले याचा आढावा घेत निवडणुकीतील सहकार्याबद्दल आभार मानले. दक्षिणचे उमेदवार ऋतुराज पाटील, उत्तरचे उमेदवार राजेश लाटकर यांनीही कार्यकर्ते, पदाधिकाऱ्यांचे आभार मानत त्यांच्याकडून आढावा घेतला.
यावेळी आ. जयंत आसगावकर, डॉ.डी.वाय.पाटील अभिमत विद्यापीठाचे कुलपती डॉ.संजय डी.पाटील यांच्यासह प्रमुख पदाधिकारी उपस्थित होते.
