मुंबई : महाराष्ट्राचे मुख्यमंत्री भाजपचे नेते देवेंद्र फडणवीस यांनी शपथ घेतलेली आहे. शपथविधी सोहळा मोठ्या उत्साहात पार पडला. पण यामध्ये फक्त मुख्यमंत्री आणि उपमुख्यमंत्र्यांचाच शपथविधी झाला होता. तर आता नव्या सरकारच्या मंत्रिमंडळ विस्ताराचे अखेर ठरले असल्याची माहिती समोर आलेली आहे. तर या नव्या सरकारचा मंत्रिमंडळ विस्तार 14 तारखेला होणार असल्याचे सांगण्यात आले आहे.

महाराष्ट्र विधानसभेचे हिवाळी अधिवेशन सोमवारपासून दि.16 ला नागपुरात सुरू होणार आहे. याआधी मुख्यमंत्री देवेंद्र फडणवीस यांच्या नेतृत्वाखालील राज्यातील नव्या महायुती सरकारच्या मंत्रिमंडळाचा विस्तार करण्याचा प्रस्ताव आहे. येत्या 14 डिसेंबरला राज्य मंत्रिमंडळाचा विस्तार होईल. बुधवारी रात्री अमित शहांसोबतच्या बैठकीत महायुतीने मंत्रि‍मंडळाच्या विस्तारासाठी तारीख पक्की केली गेली आहे. तर यावेळी भाजप, शिवसेना आणि राष्ट्रवादी यांना कोणकोणती खाते मिळणार यावरही शिक्कामोर्तब करण्यात आलेला आहे.

एकनाथ शिंदेंच्या शिवसेनेला गृहखाते, महसूल खाते दिले जाण्याची शक्यता खुप कमी आहे. पण एकनाथ शिंदेंच्या शिवसेनेला नगरविकास मंत्रालय देण्यात येईल. आणि यासोबतच भाजप स्वत:कडे 20 मंत्रिपद ठेवू शकते. तर शिंदे गटाला 12 आणि अजित पवार गटाला 10 मंत्रिपद देण्यात येणार असल्याचे सांगण्यात येत आहे. महाराष्ट्रातील मंत्रिमंडळ विस्ताराबाबत विचार करण्यासाठी मुख्यमंत्री देवेंद्र फडणवीस बुधवारी रात्री उशिरा केंद्रीय गृहमंत्री अमित शहा यांच्या घरी पोहोचले होते. या बैठकीत नवे मंत्रिमंडळ कसे असेल, यावर चर्चा करण्यात आली आहे.