शिरोळ : श्री क्षेत्र नृसिंहवाडी (जि.कोल्हापूर) येथील दत्त मंदिरात आज चालू सालातील दुसरा दक्षिण द्वार सोहळा मोठ्या उत्साहात संपन्न झाला. येथील प्रसिद्ध दत्त मंदिर पूर्वाभिमुख असून दत्त मंदिरासमोर वाहणारी कृष्णा नदी उत्तर दिशेकडून दक्षिणदिशे कडे वाहते. पावसाळ्यात नदीचे पाणी वाढलेने मुख्य मंदिराच्या उत्तरद्वारातून कृष्णानदीचे पाणी मुख्य गाभाऱ्यात प्रवेश करून श्रींच्या मनोहर पादुकांना स्पर्श करीत मंदिराच्या दक्षिणद्वारातून बाहेर पडते. यालाच दक्षिणद्वार सोहळा असे म्हंटले जाते.
यावेळी मुख्य मंदिराच्या दक्षिणद्वारातून बाहेर पडण्याऱ्या नैसर्गिक तीर्थात स्नान करणे पुण्यकारक मानले जाते. तसेच या सोहळ्यात स्नान केलेने मानवाच्या पापाचा ऱ्हास होवून पुण्यप्राप्ती होते, अशी भाविकांची धारणा व विश्वास असलेने या सोहळ्यात स्नान करण्यासाठी भाविक मोठ्या संखेने हजेरी लावतात.
दरम्यान, यावेळी भाविकांनी दक्षिण द्वार सोहळ्यासाठी मोठ्या संखेने हजेरी लावली होती. संतधार पडत असलेल्या पावसामुळे नद्यांच्या पानी पातळीमध्ये झपाट्याने वाढ होत असून तालुक्यातील शिरोळ, तेरवाड, राजापूर तीन बंधारे पाण्याखाली गेले आहेत
