कपिलेश्वर (प्रतिनिधी) : महाराष्ट्रासह,कर्नाटक,गोवा येथील लाखो भाविकांचे श्रद्धास्थान म्हणून ओळख असणाऱ्या श्रीक्षेत्र आदमापुर ता.भुदरगड येथील सद्गुरु बाळूमामा यांची बकरी आदमापूर येथे दाखल झाली आहेत.प्रत्येक वर्षी दीपावली पाडवा या दिवशी बकरी बुजवणे आणि लेंडी पूजन मोठ्या भक्ती भावाने केली जाते.या कार्यक्रमासाठी ही बकरी आदमापूर येथे आली आहेत.बाळुमामाची सध्या महाराष्ट्र आणि कर्नाटकात 19 ठिकाणी कळपांच्या माध्यमातून 32 हजारावर बकरी चाऱ्यासाठी फिरत आहेत.
या बाळूमामाच्या बकऱ्याची त्यांचे भक्तगण मनोभावे सेवा करीत आहेत.दिवसे दिवस बाळूमामाची बकरी वाढतच आहेत.दीपावली पाडवा या दिवशी बाळूमामा यांची बकरी लेंडी आणि बकरी बुजवणे कार्यक्रम पार पाडण्यासाठी यामधील एक कळप दरवर्षी आदमापूर येथे येतो.कारभारी नागाप्पा मिरजे यांचा कळप क्रमांक सहा यावर्षी आदमापुर मध्ये दाखल झाला आहे.गावच्या वेशीपासुन ढोल कैताळाच्या आवाजात ,भंडाराच्या उधळणीत,डॉल्बीच्या ठेक्यावर या बकऱ्यांचे स्वागत करण्यात आले.
त्यानंतर बाळूमामाच्या समाधी स्थळी मालकाच्या दर्शनासाठी बकऱ्यांची मंदिराभोवती प्रदर्शना काढण्यात आली.गावातून मरगुबाई मंदिराकडे बकरी जात असताना सुहासिनींनी ठिकठिकाणी त्यांचे औक्षण केले.यावेळी फटाक्याची आतषबाजी करत बकरी आदमापूर येथे आणण्यात आली.साधारणपणे एक महिना ही बकरी आदमापूर येथे मुक्काम असतो त्यामुळे बकरी तळावर रोज अनेक कार्यक्रम आयोजित केले जातात.
