नाशिक : मराठा समाजाला ओबीसी प्रवर्गातून आरक्षण मिळावे यासाठी मनोज जरांगे पाटील यांनी पुन्हा एकदा अंतरवाली सराटी येथे उपोषण सुरू केलं आहे. जरांगे यांच्या उपोषणाचा आज चौथा दिवस आहे. उपोषणामुळे जरांगे यांची प्रकृती खालावली आहे. पण त्यांनी डॉक्टरांकडून उपचार घेण्यास नकार दिला आहे. यावरून मराठा समाज आक्रमक झाला असून त्यांनी शरद पवार यांनी पुढाकार घ्यावा अशी मागणी केली आहे.
दरम्यान, मराठा समाजाच्या मागणीसाठी जरांगे पाटील उपोषण करत आहे. नाशिक जिल्हा त्यांच्या पाठीमागे उभा आहे. आम्हीही या लढ्यात सहभागी होत आहोत. आमदार आणि खासदार यांना सकल मराठा समाजाची विनंती आहे की, नवनिर्वाचित खासदारांनी तात्काळ अंतरवाली सराटी येथे जाऊन मनोज जरांगे पाटील यांना आपल्या लेटर पॅडवर पाठिंबा द्यावा. मनोज जरांगे पाटील यांना आपण जर पाठिंबा देणार नसाल तर तुम्ही मतदारसंघात कसे फिरणार तेच बघतो, असा इशारा त्यांनी यावेळी दिला आहे.
अंतरवली सराटीत सुरू असलेल्या मनोज जरांगे पाटील यांच्या आंदोलनाच्या पार्श्वभूमीवर नाशिकमध्ये सकल मराठा समाजाची बैठक पार पडली. याबैठकीत मराठा आरक्षणावर सविस्तर चर्चा करण्यात आली. राज्यातील ज्येष्ठ नेते शरद पवार यांनी मराठा आरक्षणासाठी पुढाकार घ्यायला हवा, असं बैठकीनंतर मराठा समन्वयकांनी सांगितलं.
ते पुढे म्हणाले की, सकल मराठा समाज शरद पवार यांना विनंती करतो की, आपण पक्ष फुटल्यानंतर महाविकास आघाडीचा जसे नेतृत्व केले, तसे आपण मराठा आरक्षणासाठी आपण सर्व पाठिंबा देणाऱ्या पक्षांच्या नेत्यांना सोबत घ्यावे. अंतरवाली सराटी या ठिकाणी जाऊन महाराष्ट्राला मार्गदर्शन करावे. शरद पवार यांनी जर आमच्या आरक्षणासाठी पुढाकार घेऊन मार्ग सोडवला तर आम्ही सर्व मराठा समाज आपल्यासोबत राजकीयदृष्ट्या सक्रिय राहू. आम्हाला जर आपण पाठिंबा देणार नसेल तर आम्ही राज्यभर लाक्षणिक उपोषण करू आणि आमचे पहिले उपोषण हे शरद पवार यांच्या घरापासून असेल, असा इशारा यावेळी करण गायकर यांनी दिला आहे.
पुढील दोन दिवसांत मनोज जरांगे पाटील यांचे आंदोलन सोडविले नाही तर आम्ही पुढील भूमिका घेऊ. मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी पुढाकार घेतला तरी चालेल. सरकारने जरांगे पाटील यांना फसवलं आहे. सगेसोयरेची फसवणूक झाली आहे. लोकसभेत मराठा समाजाचा फटका बसलाय की नाही याचे मुख्यमंत्री शिंदे यांनी आत्मपरीक्षण करावे. आमच्या मागण्यांचा विचार करावा, अजूनही वेळ गेली नाही, असेही त्यांनी म्हटले आहे.
