बेंगळूर : कर्नाटकमधील हसन लोकसभा मतदारसंघाचा उमेदवार व सेक्स स्कँडलमधील मुख्य आरोपी प्रज्वल रेवण्णा (वय ३३) याला बेंगळूर पोलिसांनी शुक्रवारी विमानतळावरच अटक केली. विशेष म्हणजे त्याला अटक करणाऱ्या टीममध्ये सर्व महिला पोलिसांचा समावेश होता. दरम्यान, न्यायालयाने आता त्यांना 6 जूनपर्यंत पोलीस कोठडी सुनावली आहे.
महिन्याभरापूर्वी सेक्स टेप प्रकरण उजेडात आल्यानंतर प्रज्वल रेवण्णाने भारतातू पळ काढला होता. तसेच ते जर्मनीत असल्याची माहिती पुढे आली होती. त्यानंतर काही दिवसांपूर्वी त्याने एक व्हिडीओ शेअर करत आपण 31 मे रोजी भारतात आत्मसमर्पण करणार असल्याचे सांगितले होते. त्यानुसार प्रज्वल रेवण्णा आज सकाळी भारतात दाखल झाला.
दरम्यान, रेवण्णा भारतात दाखल होताच कर्नाटक पोलिसांच्या विशेष पथकाने बेंगळूरच्या केम्पेगौडा आंतरराष्ट्रीय विमानतळावरुन त्याला अटक केली. तसेच त्यांना वैद्यकीय तपासणीसाठी रुग्णालयात नेण्यात आले. त्यानंतर त्याला विशेष न्यायालयात हजर करण्यात आले. यावेळी न्यायालयाने त्याला सहा दिवसांची पोलीस कोठडी सुनावली.
