शाहूवाडी (प्रतिनिधी) : बांबवडे-कोकरूड मार्गावर सरूड नजीक जीप आणि दुचाकीची समोरासमोर धडक होऊन झालेल्या अपघातात एकजण ठार झाल्याची घटना आज (शुक्रवार) घडली आहे. विनायक कोळवणकर (रा. कोकरुड, ता. शिराळा) असे या मृत व्यक्तीचे नाव आहे.
घटनास्थळावरून मिळालेली माहिती अशी की, सरुड येथील कडवी नदीजवळ आज दुपारच्या सुमारास दुचाकी होंडा शाईन क्र. MH 09-DE 5174 यावरून विनायक दत्तात्रय कोळवणकर आणि आरती कोळवणकर हे बांबवडेहून कोकरूडच्या दिशेने जात होते. तर सरूडहून बांबवडेच्या दिशेने येणारी कमांडर जीप क्र. MH 10 C- 3668 घेऊन चालक मोहसीन बादशहा मणेर (रा. बांबवडे ता. शाहूवाडी) हा येत होता.
दरम्यान सरुड येथील कडवी नदीच्यानजीक या दोघांमध्ये समोरासमोर धडक झाली. यात दुचाकीवरील विनायक कोळवणकर आणि आरती कोळवणकर हे गंभीर जखमी झाले. घटनास्थळी जमलेल्या नागरिकांनी त्यांना पुढील उपचारांसाठी रुग्णवाहिकेतून कोल्हापूर येथे पाठवले. मात्र, डॉक्टरांनी उपचारापूर्वीच विनायक कोळवणकर यांचा मृत्यू झाल्याचे सांगतिले. याचा अधिक तपास शाहूवाडी पोलीस करीत आहेत.
