कोल्हापूर (प्रतिनिधी) : गोवा येथे २७ ऑक्टोबररोजी पार पडलेल्या ‘आयर्न मॅन ७0.३’ या आंतरराष्ट्रीय स्पर्धेत कोल्हापूर जिल्‍हा सहकारी दूध उत्‍पादक संघाचे कर्मचारी नामदेव मारुती कळंत्रे (रा. इचलकरंजी) हे गोकुळमधील पहिले ‘आयर्नमॅन’ कर्मचारी ठरले आहेत. याबद्दल संघाचे चेअरमन अरुण डोंगळे यांच्या हस्ते त्यांचा सत्कार करण्यात आला.
यावेळी अरुण डोंगळे म्हणाले की, आरोग्य चांगले आणि तंदुरुस्त ठेवण्यासाठी नियमित व्यायाम, योग्य आहार महत्वाचा असून प्रत्येकाने आपले शरीराचे स्वास्थ चांगले कसे राहील यासाठी प्रयत्न करणे गरजेच आहे. नामदेव कळंत्रे यांनी जिद्दीच्या आणि मेहनीच्या जोरावर ही अवघड स्पर्धा विहित वेळेपूर्वी पूर्ण करून ‘आयर्नमॅन’ (लोहपुरुष) हा किताब पटकावला. या मिळविलेल्या यशामुळे गोकुळ दूध संघाच्या शिरपेचात आणखी एक मानाचा तुरा रोवला गेला असल्याचे डोंगळे यांनी सांगितले.
तसेच नामदेव कळंत्रे यांना यापुढे होणाऱ्या आंतरराष्ट्रीय स्पर्धेत सहभाग घेण्यासाठी आवश्यक ती आर्थिक मदत आणि सहकार्य गोकुळमार्फत करणार असल्याचेही डोंगळे यांनी यावेळी जाहीर केले.
नामदेव कळंत्रे म्हणाले की, जिद्द चिकाटी आणि ध्येयसक्ती हा कोल्हापूरच्या मातीचाच गुण असून सरावासाठी योग्य वातावरण असल्यामुळे ‘आयर्न मॅन’ झालो असल्याचे सांगितले.
या स्पर्धेमध्ये ६१ देशातील सुमारे १,५०० स्पर्धकांनी सहभाग घेतला होता. या स्पर्धेत एकूण ११३ किमीचे अंतर कळंत्रे यांनी अवघ्या साडेसात तासात पूर्ण केले. यामध्ये २ किमी पोहणे, ९० किमी. सायकलिंग आणि २१ किमी धावणे अशा प्रकारात हे अंतर साडेआठ तासात पूर्ण करायचे होते. सुमारे ३६ डिग्री तापमान सहन करीत हे अंतर त्यांनी कमी वेळेत पूर्ण करून कोल्हापूरचे नाव उंचावले आहे.
यावेळी संचालक विश्वास पाटील, बाबासाहेब चौगले, अजित नरके, शशिकांत पाटील-चुयेकर, नंदकुमार ढेंगे, कर्णसिंह गायकवाड, संभाजी पाटील, प्रकाश पाटील, अमरसिंह पाटील, बयाजी शेळके, अंबरिषसिंह घाटगे, मुरलीधर जाधव, संचालिका श्रीमती अंजना रेडेकर, कार्यकारी संचालक योगेश गोडबोले, संघाचे अधिकारी, कर्मचारी उपस्थित होते.
