कोल्हापूर (प्रतिनिधी) : बच्चे सावर्डे गावात खडी विभागात सावर्डे – कांदे रोड जवळील बापुसो आनंदराव बच्चे यांच्या शेतात सातवे येथील बिरू लखू आंब्रे यांच्या शेळ्यांचा कळप चरण्यासाठी आला होता. दरम्यान पहाटे 4 वाजता अचानक बिबट्याने हल्ला करून एका शेळीला ठार करून नेत असताना आंब्रे यांना दिसले त्यांनी आरडाओरड केल्यानंतर बिबट्याने शेळीला तिथेच सोडून शेजारील ऊसात पळ काढला.याची माहिती बच्चे सावर्डेचे पोलीस पाटील सागर यादव यांना समजताच त्यांनी घटना स्थळी येऊन पाहणी करून वन विभाग पन्हाळा यांच्याशी संपर्क साधला.

माहिती मिळताच वन विभाग पन्हाळ्याचे परीक्षेत्र वनधिकारी अनिल मोहिते यांच्या मार्गदर्शनाखाली, परिमंडळ वनधिकारी सागर पटकारे, नियतक्षेत्र अधिकारी संदिप पाटील, सचिन जाधव यांनी येथे येऊन सदर घटनेचा पंचनामा केला. यावेळी ऊसात पळ काढलेल्या बिबट्याच्या पायाचे ठसे आढळून आले असून गावातील शेतकऱ्यांनी शेतात जाताना एकटे जाऊ नये,सोबत बॅटरी,काठी बाळगावी तसेच योग्य ती खबरदारी घेण्याची सूचना केली आहे. सावर्डे गावात आत्तापर्यंत बिबट्याने अनेक वेळा हल्ले करून गावातील पाळीव श्वान तसेच शेळी,मेंढ्या यांच्यावर हल्ला करून ठार केले आहे.यामुळे गावात भीतीचे वातावरण निर्माण झाले आहे.

आत्तापर्यंत घडलेल्या घटनेत वन विभाग पन्हाळा यांनी तात्काळ येऊन पंचनामा करून शासनास प्रस्ताव दाखल केल्यामुळे मेंढपाळांना शासनाकडून आर्थिक नुकसान भरपाई मिळाली आहे. वन विभाग यांनी बिबट्याला सापळा लावून पकडून त्याचा कायमचा बंदोबस्त करावा अशी मागणी होत आहे. नागरीकांनी सतर्क राहण्याचे आवाहन बच्चे सावर्डे गावचे पोलिस पाटील सागर यादव यांनी केले.