कोल्हापूर( प्रतिनिधी ) : राज्य शासनाच्या सांस्कृतिक कार्य संचालनालयामार्फत आयोजित 21 वी महाराष्ट्र राज्य बालनाट्य स्पर्धा, कोल्हापूर केंद्रावर 13 जानेवारी 2025 पासून सुरु होत आहे. या स्पर्धेची प्राथमिक फेरी राज्यात 10 वेगवेगळया केंद्रांवर आयोजित करण्यात आलेली आहे.

सांस्कृतिक कार्य मंत्री आशिष शेलार आणि सांस्कृतिक कार्य विभागाचे अपर मुख्य सचिव विकास खारगे यांच्या मार्गदर्शनाखाली या स्पर्धांचे आयोजन करण्यात येत आहे. कोल्हापूर – सांगली हे विभागून केंद्र असल्याने, दिनांक 13 ते 17 जानेवारी दरम्यान राजर्षी शाहू स्मारक भवन, कोल्हापूर येथे तसेच दिनांक 18 ते 22 जानेवारी 2025 पर्यंत सांगली येथे एकूण 44 नाट्य संस्थांची बालनाट्य सादर होतील.

सातत्याने 20 वर्ष चालणारी ही बालनाट्य स्पर्धा आहे. प्रत्येक दिवसाला चार ते पाच बालनाट्य प्रयोग होणार असून सकाळी 9 वा. ते दुपारी 4 वा. पर्यंत प्रयोग सादर होणार आहेत. नाट्य रसिकांनी याची नोंद घ्यावी, आपल्या जिह्यातील बालकलावंतांची कला पाहण्यास आणि त्यांना प्रोत्साहन देण्यास जास्तीत जास्त रसिक प्रेक्षकांनी उपस्थित राहावे, असे आवाहन सांस्कृतिक कार्य संचालक बिभीषण चवरे यांनी केले आहे.