कोल्हापूर ( प्रतिनिधी ) : सर्वच महिलांना लांब आणि सुंदर नखं हवी असतात. नखांमुळे हातांच्या सौंदर्यात वाढ होते. पण हिवाळ्याच्या दिवसांमध्ये वातावरणात होणाऱ्या बदलांचा परिणाम आरोग्यावर लगेच दिसून येतो. त्वचा कोरडी पडल्यानंतर नखांच्या आजूबाजूची त्वचा कोरडी होऊन जाते, ज्यामुळे हळूहळू नखं सुद्धा निस्तेज आणि कमकुवत होतात. नखं नाजूक होऊन सतत तुटू लागतात.
वातावरणात सातत्याने होणाऱ्या बदलांमुळे आरोग्यासोबतच त्वचा, केस आणि नखांचे आरोग्यसुद्धा बिघडून जाते. पण पुढील टिप्स फॉलो करून थंडीतही नखांच आरोग्य चांगले ठेवू शकता.
बेकिंग सोडा आणि पाणी : नखांच्या निरोगी आरोग्यासाठी बेकिंग सोड्याचा वापर करावा. बेकिंग सोड्यात असलेले गुणधर्म नखं स्वच्छ करण्यासाठी मदत करतात. यासाठी वाटीमध्ये बेकिंग सोडा घेऊन त्यात पाणी मिक्स करून पेस्ट तयार करा. तयार केलेली पेस्ट नखांवर लावून व्यवस्थित चोळून घ्या. नखांवर हलक्या हाताने मसाज केल्यानंतर नखं पाण्याने स्वच्छ करा. यामुळे नखांची त्वचा मऊ होईल आणि नखं सतत तुटणार नाहीत.
बदाम आणि खोबरेल तेल : खोबरेल तेलात असलेल्या गुणधर्मांमुळे त्वचा मऊ आणि चमकदार राहण्यास मदत होते. वातावरणातील गारव्यामुळे नखं सतत तुटू लागतात. अशावेळी नखांना बदाम आणि खोबरेल तेलाने मसाज करावा. यामुळे तुमची नखं तुटणार नाहीत. नखांची योग्य वाढ होईल.
लिंबाचा रस : विटामिन सी युक्त लिंबू त्वचेच्या आरोग्यासाठी अतिशय प्रभावी आहे. वाटीमध्ये लिंबाचा रस घेऊन त्यात पाणी मिक्स करा. पाण्यात 15 मिनिटं हात तसेच बुडवून ठेवा. त्यानंतर पाण्याने हात स्वच्छ करा. यामुळे निस्तेज झालेली नखं स्वच्छ आणि चमकदार दिसू लागतील.
